Miin “I tha hle mai” tih lam hawia thu an han sawi chuan, insit ve thei thin tak pawh khan a thatnate chu a va hmuh phahin chu chuan thui takah a hlangkai thin a nih kha maw. Chutianga, mi faknain tam tak kan nuna chakna min pek si chuan chu “Fakna” chu kan chhungah kan vulh thei lo vang em ni? Tehkhin nan, ni tin mahni leh mahni han infak mawlh mawlh te hi? Chu chu, kan hriat phak piah lama “Theihna” ropui tak kan neih kohchhuah nan thil tha tak a ni si a. Khuanu’n mi aia that danglam bikna nei lo bik hian a siam ringawt lo che a, chu kan that danglam bikna (or kan extraordinary/ unique talent) chu engnge a nih tih kan lo chhui thin lo a, mahni kuanglo nawra hmasawn thei loin kan insit leh fo thin a ni. Tichuan, mi lar tak takte kan hmuhin anmahni ang nih ve kan chak thin a. Amaherawhchu, chutiang mi nun kan awh em em na chuan, achangin mahni inhmuhsitna min thlen leh thin. Chu ai chuan, “Kei chu keimah ka ni a”, “Ka nih chak ber pawh keimah ka ni” ti khawpin mahni leh mahni han in ngaihlu ta ila, hma kan sawn chak zawk lo ang maw?

Kawlrama kan zofate, kan ram harsatna avangin mi ramah a tha zawk em(aim)in kan kal chhuak hlawm a. Mahse, kan ram kan chhuahsan hmaa kan benga lut tam thin chu, kawlram mi min hmuhsit thu a ni duh chawk mai. Tichuan, mi ramah mi hmuhsit tura indah sa ringawtin kan kal chhuak thin a nih hi. Mahse, kawlram kan zofate hian kan hmuhsit awm loh zia hi kan inen chian thin a tha a ni. Chungnungbera Pathian bia kan ni, hmuhsit theih kan ni lo. “Mizo kan ni, kan hmel a tha, kan tum a sang bawk si” tih rei tak atang lo chham tawhte kan ni bawk, kan duai bik lo. Mahni han inenfiah ila mi ten min han hmusit leh mai thin hi chu a chhan tam tak ni thei a lang chu, miten an hmuhsit hma che khan nangmah leh nangmah i inhmusit hle tawh inhmuhsit tur lekin i awm a ni thei. Kan hriat reng tur chu, hetianga min lo hmusit mai mai tute hi chu anmahni pawh eng ual ni vak lo, an ram level pawha mi hmuhsitawm ve tak takte an ni duh chawk. Hnampui tak tak sap hote nen kan han tehkhin chuan an hmuhsit awmzia a lang thei mai awm e. Tichuan, sap tawng i thiam tam emaw a tlem emaw i thiam chhuna i awphawi kha han en la, tichuan i word hriat zat ang vel hre ve tur awm ni a i hriat i ngaihsan em em Korean, Japanese, Chinese, Indian emaw Singapore pa (Malaysian mi pawh ni se) awphawi nen khan han tehkhin la, kan kawlram zofate English awphawi a duai loh zia i hmu ang. I rilru put azirin miin an hmusit ngamin an ngam dawn lo che a ni. Ar pawh a la a nih lai chuan ti hlein duh duha um phar theih ni mah se, apui a han nih chi-na a rilru a han danglam chinah chuan a chakna neih chu pangngai reng mahse kan zuam dan a dang deuh thin a nih kha maw.

Mihring ve mai famkim lohna nei ve theuh te kan ni a, kan nunah kan thil tih sual awm lo takte kan tih sual chang pawh a awm ang, vanduaina avangin pachhe tak mi te endawng tak dinhmunah pawh kan lo ding thei e, mahse, chutiang dinhmun i ding a nih pawn nangmah i in ngaihhlutna chu engtikah mah tikiam hlek suh ang che. Engti khawpa mi te ngaih nep emaw hmuhsit emaw pawh lo ni mah la“Ka tha bera, ka tha zual zel deuh deuh dawn a ni” tih rilru pu reng ang che. Hnemtu i neih loh laiin mahni leh mahni inhnem mawlh mawlh thinin, fuihtu i tawng loh laiin infuih mawlh mawlh la, faktu i tawng loh laiin infak mawlh mawlh thin ang che. Gangster film hmuhnawm tak maiah chuan heti hian thuvawn an nei a, chu chu;- “Never lose face, never get jumped on, get your shoes polished even if you skip a meal, never fail to respect yourself even if you starve to death” tih a ni. Chuvang chuan, nasa leh zual zawka kan thanlen theihna tur chuan mahni inngaihsanna (self-esteem) te, inrintawkna (self-confidence) te leh rilru puthmang dik tak (positive-attitude) te kan neih hmasak a pawimawh em em a ni. Mi’n min lo ngainep deuh a nih pawn, “Nia, nang chu i tha a lawm”, “Mahse, nang ai hian ka la tha zawk dawn a, ka tha zawk mek reng bawk” tih rilru kan put ran a tha ang. Amaherawh chu, kan hriat reng tur chu mi rama kan awm a nih chuan “Kan ram a ni lo, mi ram a ni” tih leh “Rome a i awm chuan, Rome mi angin awm rawh” tih te kha a ni. Tichuan, “Pride” leh “Self-confidence” kan neih te chu a that em em laiin kan nihna ai baka “over” taka kan hmang chuan mi tih hmasawn aiin min ti mualpho zawk dawn a ni. Insit mai lovin, kan retheihna in mi rama passport loa kala visa lova min awm tir a nih chuan in thlahrunna chu kan nei em em tur a ni a, “he ram tan hian eng thiltha nge ka tih sak ve theih ang aw” tih rilru pu reng chunga a ram tan that theih tawp kan chhuah ve a pawimawh a ni. Chutilova, in luah man pawh pe lo, aruka mi in lo luah, zak chuang lo, mi pawh ka awm ang hian rawn awm ve mai mai rawh se tih rilru pu ang maia mi rama kan awm si chuan, hmuhsit leh ngaihnep tawk lek chu kan ni ang le.

Kan hriat leh reng tur bawk chu, thiltih tel lo ka leh rilru chauha tanlakna ringawt hi mitin thanmawh bawk a ni. Mi anga rilru chak pui pui ni ve lo mah la, i thil tiha chawl lo leh Pathian hre reng chunga regular taka i tih det det chuan; thingzung chakna pawh nei lo ang tak, mahse regular taka a thanduan chhohna avanga khuarei hnua lungruh sak tak te pawh chhun tlang thei ang mai hi i la ni dawn a ni. Harsatna kan lo tawh deuh pawn kan hla in “Ringtute nunkawngah hian….” tia a sawi ang bawkin “Mihlawhtlingte nunkawngah hian, hreawm tamtak a awm a- kawngnuam a ni lo va, tawrhna in bul an tan thin” tih hi kan hre leh thin dawn nia. Tichuan, keini Liandova te unau, Kawlrama awm Zofate leh Mizorama awm zofate, hi hnamdang te endawng leh hmuhsit la ni hrih mah ila, ni khat khat chu Khuanu’n mi te min hmuhsitnate la kiang tura kan tana a ruat kan dar leh tangkarua chu kan la hmuh chhuah ni a la awm ve ngei ang. Keini a tlem zawk ni a, a nau zawk chan chang kawlram Zofaten, kan u Liandova thlenna a thlen ve chu chak thinin, in hnuai atang chuan Liandova chanpual chu kan lo tem ve dem dem thin a. Hmuhsitawm, â tak leh, zahpuiawm taka kan chet chang pawh a lo awm leh thin. Mahse, Liandova te unau chanchinah khan a nauzawk a nih kha maw an unau zahawmna tur hmuchhuaktu kha. Kawlrama Zofaten hmasawnna leh hlawkna duhawm tak takte hmuchhuak turin ram tinah kan inphahdarh hlawma, kan duai lohzia hi ni khat ni chuan kan la lan chhuah tir thei ngei dawn a ni. Chumi rawn chawr chhuak tur chuan i duai lohzia a taka i lan tir hun kan lo thlir reng asin. I thaber lo em ni?