Hun leh kumte Pathian remruat ang zelin a lo inher danglam a, chu chuan ngaihtuahna thar leh tum dan thar a rawn herchhuah pui bawk a. Mitin mai hian mi hlawhtling nih tumin hma kan la tan leh dawn a ni.
Kum a lo thar hian Mitin te hian kum hluia kan nun dan leh thiltihte kan thlir kir a, mi thenkhat chu an inchhir ngawih ngawih lain thenkhat an lawm a, mitin hian kum hlui aiin kumtharah hlawhtlinna
ropui zawk hmuh kan tum theuh a ni. Tin, hlawhtlinna hi chi hrang hrang a awm thei awm e. Leilet pa tan chuan rim taka a thawh rah a seng ni chu a hlawhtlin ni a ni a. Sumdawngtu chuan sum a pei pun tam pauh leh hlawhtling a in ti a, Zirlaiin a zirna kawnga a tih that chuan a hlawhtling a ni. Heng hlawhtlinna hi a tha vek a, nimahsela, Krista nen a nih loh chuan Pathian ngaihah hlawhtling a ni lo. Krista tellova hlawhtlinna chu lungngaih, manganna leh phurrit mai a ni a, chhungkaw hlimna aiin chhungkaw kehchhiatna bul a ni thin. Chuvangin, hlawhtlinna tak tak hmu tur chuan enge pawimawh ber ang? Tunah chuan mi hlawhtling kan nih theih nan Bible-a mi hlawhtling panga-te chanchin kan zir dawn a ni.

1.Pathian beiseitu Jakoba. Gen. 32:22-32;(Beiseina)
       Jakoba'n Pathian a beisei dan hi a entawn tlak hle mai. Amah hi Esauva unau a ni a, Bible-in a sawi dan phei chuan "mi nichuah" tih a ni. Engmah thawh thiam nei lo, in lama Nute chaw chhum pui vel mai maitu a nih hmel. Nimahsela, Pathian lamah erawh chuan rinna nei nghet tak, Pathian beisei tlut mi a ni. A pu Labana hnen atanga an khaw lama a hawn tum khan Jabok lui kaiah Pathian a buan a, hemi zan hian zan khuain an inbuan a nih a rinawm. Bible chuan "A buan a buan a" a ti a, an inbuan rei tawk hle awm e.

       Tichuan, khua a var dawn tawh avangin Pathian chuan min thlah tawh rawh, khua a var dawn tawh e, a ti a. Mahse, Jakoba chuan mal min sawm phawt loh chuan ka thlah lovang che, a ti tlur mai a, mi hlawhtling a nih hma loh chuan chhuah a tum hauh lo. A tawpah chuan a hming chu a zawt a, Jakoba a nih thu a hrilh veleh, "Jakoba i ni tawh lovang a, Israela i ni tawh ang," tih thu ropui tak a dawng a, Bumtu ni thin kha Pathian Lal fa nihna a lo chang ta a ni.
       Jakoba hlawhtlin chhan ber chu, "mal min sawm hma loh ka thlah lovang che," tih hi a ni. Pathian thlah duh hauh lotute hi mi hlawhtling an ni fo thin. Pathian tellova mahni a tlei thei viau hi Pathian lawm zawng a ni lova, Pathian tellova awm thei lo, "Lalpa, I tello chuan" ti tute hi mi hlawhtling an ni fo. Tunlai ringtu zingah khawvel, tisa thila hlawhtlin tum a, Pathian thu hlamchhiah kan tam hle a, Pathian tellova hlawhtlinna chu a hman tlak tak tak chuang tlat lo. Chuvangin hlawhtlinna tak chang turin Jakoba anga Pathian beisei tlut mi, thlah duh hauh lotu nih a pawimawh hle ang.

2. Hreawm tuar thei Josefa. Gen. 39:1-23;(Tawrhchhelna)
       Hlawhtling tur chuan Josefa anga hreawm tinreng tuar chhuak peih mi nih a tul a, A hlawhtlinna hi a hreawm tawrh rah a seng a ni. A thawnthu chu kan hriatsa vek a ni a, a chipchiar chuan sawi a ngai lovang chu! A tleirawl chhuah phat atangin a unauten an tei thei tlat lova, an thisen zawmpui, an unaupa ngei chu tih hlum hial an duh a. Mahse, tih hlum em ai chuan hralh an ti thlu ta zawk a, Median sumdawngho hnenah cheng 20-in an hralh ta a ni. Aigupta ram a thlen hnuah pawh mi salah a awm a. Potiphera'n a chhiahhlawh a tan a lei a, sal nih hreawm tak chu a tuar chhuak vek a. Chumai a la ni lo, Potiphera nupui chuan a pawngsual a, tlawm leh zah pawh dawn lovin saruakin a tlan chhuah san a, chumi hnuah dawta sual tinrenga hekin a awm leh a, Jail bang a zut ta a ni.
       Josefa nun hi han ngaihtuah teh! A vanglai hun zawng zawng chu nuam reng reng awm lovin, hreawm takin a hmang thlingtla a ni ber. He a hreawm tawrh hi a tawpna ni ta se, Josefa hi mi vanduai ber a ni hial ang. Mahse a tawpna a ni mai lo. Pathian hminga a tawrhna chu Pathianin a hriatpui a, a hun takah Pathianin a chawimawi ta a le! Nikhat thil thuah ram khat lalber dawttu nihna chu a chang ta mai a ni. He a hlawhtlinna hi amaha lo awm mai a ni lova, Pathian avanga hreawm tinreng a tawrhna rah a seng a ni zawk.
        Mihring nunphungah pawh harsatna leh tawrhna a awm hmasak loh chuan hlawntlinna a awm thei lo. Chutiang bawkin thlarau lam nunah pawh tuarna-in bul kan tan a ni. Amaherawh chu Pathian avang ni lova, mahni suahsual avanga tuar loh tur tuara chhel viau hian engmah kawngro a su chuang lo. Chuvangin mi hlawhtling ni tur chuan Josefa anga mi tuarchhel, tuar chhuak peih mi nih a ngai a ni.

3. Mi huaisen Estheri. Estheri. 1-10;(Huaisenna)
       Persia leh Medai dan danglam ngai lo, a bawhchhetu chu chawpleh chilha tih hlum nghal theihna dan pawh zah zo lova, Lal Ahasuera hmaa ding ngam Lalnu Estheri nun hi i ngaihtuah teh ang. Lal khawnbawl Hamana'n lal ram chhunga Juda awm zawng zawngte tichimit vek turin politic a khel a, lal rilru chu a fin vervekna chuan a hmin chiang hle. Juda thla chhiara Adar thla, ni 13-chu Judaho tih mangna ni tur chu a ni. Chu chanchin chuan Juda mipuite chu a ba-ra-khaih hle a, saiip puan sinin, vaivutah an thu a, ramtin hmun tin mai chu Judaho tap thawmnin a khat a ni.
       Chutih lai chuan, lalnu Estheri erawh chu lal in-ropuiah a chipuite manganna hre lovin a lo awm a, Juda mi a nih thu a sawi ngai loh avangin tuman Juda mi a nih an hre lo. Chuvangin, Judaho tih chimitna-ah hian Estheri hi a fihlim theih ngei a rinawm a ni. Chutichuan Judahop tih chimih tur thu Estheri'n a lo hriat chuan Juda mi a nihna leh lalnu a nihna chu thut thluanpui mai mai a tum lova, tih hlum theihna dan chu paltlanga lal Ahasuera hmaa din a tum ta a ni. Estheri hi tunlai mi chu nisela chuan, "Kei ka him chuan a tawk, ka mite chuan lo tuar mai mai rawh se" a tih a rinawm. Mahse, a mite tawrhna chu a ngaingam lova, dan lo angin lal hmaah chuan a va ding ta a.

       Lalnu Estheri huaisenna chu Pathianin a lawm em em a ni. Pathian mi thlan, Judahote avanga mahni nunna pawh chan huam a, dan lo anga lal hmaa ding ngam Estheri hi Pathian tan chuan lawm loh rual a ni lo. Pathian tanpuinain lal rilru chu hnehin a awm a, a huaisenna avangin a chipuite leh ama nunna ngei chu chhanchhuahin an awm a ni. A va hlawhtling chiang em!

4. Tawngtai mi Daniela. Dan. 6:1-24;(Tawngtai nun)
       Tawngtai nun tih hi peih chang leh a lo lan chang chauhva tawngtai hi a ni lo. Tawngtai nun neitu chuan tawngtai hunbi a siam a, a hunbi siam ang zelin regular- takin a tawngtai thin. Harsatna a tawh avangin a tawngtai tam phah chiam lova, malsawmna a dawn avangin a tawngtai a thlahthlam chuang lo. Tih dan pangngaiin a hunbi siamah Pathian a pawl thin.

         Daniela nunah a fiah hle. Nikhatah vawi thum, a tih dan pangngaiin Jerusalem lamah tukverh a hawng a, a tawngtai thin a ni. A thianten a thik avangin lal Daria rilruah dawidim an phulsak a, lal
Daria hnen lova tawngtai leh thildil chu sakeibaknei pukah thlak tur a ni tih thupek an chhuah rup mai a ni. Daniela tan chuan a mangan thlak ngawt ang! Nimahsela, Sakeibaknei hlauhawmna chuan a tawngtai a ti thulh zo chuang lova, sakeibaknei hlauhawmna aiin van Pathian hlauhawmzia a hmufiah hle a, a tih dan pangngaiin nikhatah vawithum tho a tawngtai a ni. Tunlaia ringtu nun chu hei hi a ni.    

      Harsatna kan tawh leh kan tawngtai chiam a, malsawmna kan dawn leh Pathian kan hnuchhawn
leh thin. Daniela anga malsawmna leh harsatnain a tih sawn theih loh
tawngtai nun nei kan mamawh hle a ni.
       Daniela chuan a tawngtai a ban duh chuang loh avangin sakeibaknei pukah an thlak ta a. Nimahsela, thulh lo va a lo biak thin Lalpa chuan a mangan niah en mai mai a tum lo. Sakeibaknei ka chu Lalpan a tih chip tlat a, thih ngei ngeina hmunah an vawm lut emaw an tih laiin Pathian angchhungah an vawm lut a lo ni zawk. Daniela tawngtai nun chuan thilmak nasa tak a ti a, chumi ni atang chuan lal Daria thinlung a tuiral a. Daniela Pathian hi Pathian dik a ni tiin mi zawng zawngin an be tur a ni tih thupek a chhuah leh ta mai a ni. A va han hlawhtling leh chiang em!!
       Ringtu tan chuan tawngtai hi kan nunna ber a ni a, mihringin thli kan thaw a, nunna atan kan ring ang hian ringtu chuan a nunna atana a thaw lakna hnar ber a ni. Ringtu tawngtai ngailo chu thawhah (Ashma) vei ang a ni a, kawng chhuk chho a kal thei lo. Harsatna a tawh hunah a chau mai thin. Khawvela Pathian mi hman Mosia, Abrahama, Davida, Nehemia, Hani, Zakaria te pawh hi tawngtai nun nei vek an ni.

        Martin Luthera chuan "Vawiin chu thawh tur ka ngah em a, darkar thum tal ka tawngtai loh chuan ka thawk zo thei lovang" a ti. Billy Grahama pawh in "Pathian hnena ka tawngtai hman loh ai chuan chaw ka nghei mai ang" a ti bawk. Watchman Nee-a pawh hian "Ringtu, tawngtaina kawnga a
hlawhchham chuan rawngbawlna kawng dang zawng zawngah a hlawhchham sa a ni" a lo ti ve bawk. Heng thu atang hian hlawhtlinna lamtluang kan zawhna kawngah tawngtai nun hi hlamchhiah lova, kan tih makmawh a ni.

5. Thuawih nun neitu Petera. Luka. 5:1-16; (Thuawihna)
       Petera hi Galilee dil vela khawsa thin, Sangha man chu a ei zawnna atana a hnathawh ropui ber a nih thu kan hai awm lo ve. Galilee dil hi, "Ka pa Vaibel" tih khawpin a hrechiang a, chhunah len a su a, zanah a deng thin a, chutianga chhun leh zana a khawsakna hmun chu a ni. He dila sangha awm dan pawh a hriatchian hle a rinawm. Amaherawh chu Lal Isua kohna a chan dawn zan zet hi chu Galilee dil a hriatchianna chuan awmzia a nei lo. Zan khuain rim takin an deng a, a man loh thu chu Lal Isua hnenah a report a, "Nimahsela, I thuin lente kan deng leh ang e," tiin Isua thuin a len a theh leh meuh chuan Isua thu a awihna chuan sangha tam tak a man ta mai a ni. A ma rem hriatna hmanga zan khuaa a beih pawha a hlawhchhamna hmunah Isua thuin chhiarsen loh khawpa tam a
hnuakchhuak ta! A hlawhtling chiang hle mai!!
       Petera hlawhtlin dan hi a danglam bik hle a, taksa thila hlawhtlinna mai a ni lova, thlarua lam nun thuk tak a tarlang chiang hle. Sangha chauh a man lova, Isua thianghlimna hmaah a bawlhhlawhna a man chhuak hlawl mai a. Isua hmaah chuan thianghlima in ngaiten an bawlhhlawh zia ngawt lo chu sawi tur an nei lova, khawvel thila misualte hlei hlei hi an inhmufiah duh hle. A tawpah chuan Petera chu sangha mantu mai a ni lova, mahni in man chhuaktu a ni. Chu mai a la ni lo, Lal Isuan
mihring mantu-ah a siam a, thlarau tam tak Krista ke bula hruai khawmtu ropui a lo ni. Petera hlawhtlinna chhan chu Isua thuawih a, len a den vang a ni. Keini pawh Isua thu kan hman ngam chinah hlawhtlinna lam tluang kan zawh thei chauh dawn a lo ni.

Khaikhawmna
       Aw le, hlawhtlinna lam tluangah kan ke te chhep ila, Heng beiseina te, Tawrhchhelna te, Huaisenna te, Tawngtai nun leh Pathian thuawihna nun te hi kan hlawhtlin theihna tura Bible-in kawng min kawhhmuh chu a ni. Chutichuan kan 2010- hi kan hlawhtlinna kum a lo ni thei dawn a ni. Amen.