HLA CHU MAW

 Zai leh rimawi ngaina lo mihring hi an tam lo viauin ka ring.Mihring chu sawi loh, ransa leh thlai leh pangpar te pawh hian an ngaina ve tho a ni. Engpawhnise , zai leh rimawi hi chuan nungcha tin reng hi min lo ti nuamin, min lo ti hahdam thin a lo ni.Thutluang pangngaia thusawi ,kan thinlung hneh lem lo , a sawi pangngai chiah hla-a  han chham chhuah a, mi thinlung a han deng bik ta  em em  leh lung a han kuai bik ta em em mai hi-thil mak tak zawng a tling a ni .

Hla thiltihtheihna chuan rorelna dik lo a lehthal thin a , mi hausa leh mi rethei  daidanna kulbing chu a thiat darh vek a.Hla chuan mi thinlungah ram leh hnam  hmangaihna nghet takin a tuh a, khawtlang, ram leh hnam a siamthat  theih laiin indona a chawk chhuak bawk thin.Sakhaw lama kan rinna pawh hla hian a sawh nghet a.Hla thiltihtheihna hmangin nula leh tlangval kan inawi lungleng a, kan inawi tlei thin.Hmangaihna puan chhuah nan hla kan hmang fo va ,kan thinrim- na pawh a chang chuan hlain kan inhrithla bawk.

A CHIANG LO

 Zofate hi pi leh pu atanga zai ngaina hnam kan ni a , zai thiam kan lawm hle a ni. Amaherawhchu, kan lawm leh ngaihsan dan hi a uchuak rawng a kai deuh tlat. Kan hriat angin Vanlalsailova hun laiin thalai ten namen lovin kan buaipui a , nu leh pa tam takten thalaite an dem a,"Tunlai thangtharte em em hi chu" kan ti a, upa lam leh thalaite  inkar a zau hman hle a ni.A hnu rei lo teah Rengkai nula, Lalruotmawi  hmangin nu leh pa , a bikin upa lam min rawn  run a , tam takin kan buaipui dante phei kha chu thalaiten Vanlalsailova an buaipui dan nen a danglam chuang lo.Chung lam chu hlat ve tak an ni.

Kristiannain kum za chuang min chenchilh ta a, chumi chhung chuan chu ti zat vel bawk kohhran pawl hrang hrang a ding a, kristian thubul hril tawh lova puitlin lam pan  tawh  tur kan nih teh lul nen , “Piangthar tan Love-song hi sual a ni em? Lengzem hla sa chung hian  Pathian fa a nih reng  theih  ang em ? “tih ang zawhna mawlmang tak tak kan chai a la ngai hian kan pawnlanzia a hril lo  maw?  Khuangin zu  keng tel tlat nia an ngaih tlat avanga biak ina khuang lak luh an khap hun chu a liam tawh a, tunah chuan lengzem hlain sual a pai tel tlata ngaihna inzirtirna a lo chhuak leh ta a, hma kan la sawn thui lo khawp mai.

A HMINGA KRISTIAN

A thuhrimah mizote hi nghehna reng nei lo , khawvel thil kawng hrang hrang incheina tawngkam leh nunphung kawng hrang hrangah pawh tih dan leh chin dan inzirtirchhawng thuai mai, rei lo tea bansana thil  thar danglam bawh leh zung zung thin kan ni ti ila a sual tamin ka ring lo . Kan nunzia  a ngheh loh ang bawkin kan Kristian nunzia pawh a nghet chuang lo. Pianthar kan uar a, piangtharte nun dan tur leh awm dan tur Bible-in a sawite chu kan nunah hmuh tur a vang leh ang lawi si . Pianthar  kan awlsam ang bawkin tluk leh pawh kan sam a , zah chu sawi loh , tam tak chuan fiamthu sawi nan leh uanpui takah kan la hmang zui bawk .

 Tunlai Kristian-te hi inti conservative viau siin kan nun a liberal leh lawi si.  Pathian thu kan  sawi sanna  hian sakhuana leh kan ni tin nun  a then hrang ta a nih hi . Kan ni tin nuna kan do , kan khap , kan ensan a , suala kan ngaihte zinga a zatve vel hi chu kan siam chawp ; Bible-in a sawi lem loh an ni ngeiin a lang . Bible ai hian kan duh firin tehna tiang kan lek rit zawk a ni lo maw? Pathian  thu laimu hlamchhiah-a a behbawma kan inhambuai  chhung hian kan hmelma pa'n a ram lak a  thulh chuang si lo.

Nun zung hram nei si lo hian a phaw vuakah kan hlim a, a thim chinah eng lam hawiin kan lam ang zuk zuk a, Kan hetih vang hian kan chhehvela hnam dang sakhua a lo din hian ar , mulak thelh ang mai hian kan phawk hru a, a saseh  hmain kan zam ru a , buana hmain kan lo kherh leh  chiam thin . Lengzem hla sakin kan rinna tichhe theia kan ngaihna hi kan tunlai Kristianna pawnlanzia leh derthawnzia tihlanna mai a ni mai lo maw? 
 

LENGZEM Vs SUAL

 Han en maia mi pangngai awm taka lang zingah pawh , " Lengzem hla hi sual  a ni"tia lo aupui lung lung tawk an la awm ta fo mai. Heng mite nen hi chuan kan Bible hman a inang lo a nih ka ring . Kan lehkhabu rinpui berin," .... a ropui ber chu hmangaihna hi a ni...."( I Kor. 13:13) a tih lawm lawm laia hmangaihna  hla 

( Love-song , Lengzem  Hla tia kan vuah------a dik emaw?) hi " Sual a ni" lo la tih  pawr te chu!!!! Kan Bible-ah hi chuan Solomon-a lenzem hla te chu “ Hla Thlankhawm( lehlin thar ah ' Hla Chhuanvawr' an tih)'” ti hiala dah a ni a. Krista leh a kohhran, Pathian leh Israel inkar thu hmehbelna anga sawi rem ni bawk thin mah se, a nihna takah chuan Solomon-a leh Sulam Lenmawii te ho inchhaina hla, lengzem hla fir a ni a . Bible-a hmun a luah aia neu chuang lo chu lengzem hla hian hringnunah hmun a chang a; a la chang zel ang . A chhan chu mihring hi chhang chauhvin kan nung lo .

        He’ng lengzem hla tluangtlam , mipa leh hmeichhe induhna leh inhmangaihna puan chhuahna  mawi tak tak hi - mi hla thu leh thluk ru khawm a , "Pathian hla min pek " kan tih thlak ve zen te ai chuan a ngaih pawh ka ngaisang zawk hrim hrim . Nghehna nei lo mihring ," Kei atan chuan lengzem hi sual a ni,"  ti  chuan sain ngaithla malek sela a ni mai . Miin nula hmel tha a hmuh apianga uire  duhna thinlung  a pu thin a nih chuan chu mi chuan a mitmu chu kher chhuak mai rawhse ; Mit khing hnih neia Gehena-a luh ai chuan , " Ui sa ei chu zu in a awl em mai, chuvangin uisa ei hi sual a ni, " kan ti dawn em ni ang?

Ni e , Lengzem hla pawh hi kan Bible ang bawka chhiatpui leh khaw lohpui theih a ni tih chu ka pha hauh lo. Ruih theih thilte nena a inchawhpawlh phei chuan thil tha lo tak tak thlentu a ni thei . Kan Bible ngei pawh mi sang tam takin an lo chhiatpui tawh a , sawi thui a ngai lo. Thil tam tak hi chu a dawngsawngtu a zira tha leh sual nihna chen pawh a awm. 
 

CHEM CHU A PAIAH

Eng nge kan sawi tak ang le ? Lengzem hla hi sual a nih loh chuan eng tik lai pawhin khawi hmunah pawh kan sa zel mai dawn em ni ang? Hnai lo ve , bualin-a ruak ngalngata-a inbual hi fai a chiang bik a , sual a ni hek lo. Amaherawhchu sual a ni lo ve tih vanga kawngpui lun laia saruaka ka inbual phur phur kher a tul lem lo vang. A hun leh hmun thliarhrang thiam rual chu kan ni lo maw!!! Thil hi a mah maiin a sual lo va, a thlirtu  leh a chhehvel avang hian a sualin a tha thei a ni. Kan tehkhawng a zir pawh a ni ang chu .

Keini zawng mite hmuha mawi leh that tum reng reng hian kan hman hlel a , lem derna kawr hmang hian kan inthuam a, alang apauin kan ngam tawk leh zuam tawk zu leh lengzem hlaah kan tuan a , phit kan thawh vak thin.  " Zu in chu misual , lengzem hla sa chu Kristian lo" kan ti zel dawn em ni ang? Khawi Bible bung leh changah nge kan hmuh? “ I biak in hung chhunga ka thahnemngaihna  hian mi ei zo ta," a tihte pawh hi rilruah  riak reng sela a tha ngawt ang.

Thil dik niawm taka lang dik lo si a awm thei a, thil tha pawh a thlentir tumna hmanrua a dik loh chuan a lawmawm dan a kim lo tlat thei. Harsatna leh buaina lo thleng thei hi hote atanga intan a ni fo thin , A nghawng leh a tih pawi erawh chu a dam har em  em mai si a ni .Kan tihdam theih loh pawhin nat belhtirtu zawng i ni lul lo vang u. Tha lo siam tha a , tha sa tichhe lo tur chuan rilru puitling tak pua ngaihtuahna zau tak hmang a , belh tlak nun hausa kan neih a tul a ni. 
 
 

Lehkhabu rawnte:

1. Mafaa Hauhnar , THLALER AURAWL . ( Electric Veng , Aizawl: Gilzom Offset,2008)

2. C.Chawiliana, Hla Thiltihtheihzia:FALUNG.(Chamari, Aizawl: Lois-Bet,2004)

3.Vanhlupuii, Zai leh Rimawi leh A Kaihhnawihte: ZORAM I TAN CHAUH ( Aizawl: Aizawl Youth Club , J.R Bros,1998)

4.Rev.Lalfakzuala, ZORAM QUAVADIS? ( Chamari, Aizawl: Lois-Bet,2009)

5.C.Lalnuntlinga (editor) , KRISTIANNA LEH TUNLAI KHAWVEL.( Tuikhuahtlang, Aizawl: JP Offset Printer, July 2008)

6.Pathian Lehkhabu Thianghlim.