Kum 63-na hmang mek Pi Susan-i chuan, tuk danga a tih thin angin; a zing tho chu boruak tha hip turin a huan zau tak mai chu a’n fang kual leh a. A huan chhunga a lo enkawl puitlin(g), thei-kung chi hrang hrangte-in an pi chibai an lo buk niawm taka an lo phu suau suau te chuan, Pi Susan-i chu an tihlim hliah hlaih hle a. Zing boruak thiang leh dai nuam tak karah chuan, sava-te pawh an tawngin an inbia a, an inchhaih a, an in-um, an chip neuh neuh hlawm a. Chungte chuan, Pi Susan-i khawharnate chu a’n chhawk zangkhai tak zet a ni.

Pi Susan-i chuan, Sava te tak te-te inchhaih, in-um, eng thu thu emaw an han sawi niap niap mai te, etc. chu hmuhnawm ti em em hian a lo thlir dauh dauh a. An thusawite hrethiam mah suh se, Pi Susan-i hmelah chu hlimna, duhawmnate a rawn zam chhuak tlat a ni. Tichuan, a huan chu muang te-in a’n fang kual ta zel a. Pi Susan-i hi khawngaihthlak ve tak a ni awm e; a pasalin a boralsan tak a chin chu, tuk tin zan tin lungleng leh khawhar reng rengin hun a hmang hi a ni ber thin. Hlimna leh lawmnate chu nei ve zawk thin mah se, rei an rial ngai ta meuh lo; a hlimna tawmpuitu a kiangah a awm ta meuh si lo va. A fanu neih chhunin an hnena cheng turin, kawng tin renga thlemin sawm nasa hle mah se, Pi Susan-i thinlung chu a hmin thei tlat lo. A fanute chenna chu khawchhung, hmun lai-li a ni a; a makpa (a fanu pasal) chu Company lian tak neitu a ni bawk a, chhungkaw khawsa nuam tak zawng an ni a. Pi Susan-i thinlungah chuan, ‘mahse……’ tih a awm tlat thung. A pasal a lo dawm hlumna hmun leh, hlim taka an lo khawsak dunna hmun chu chhuahsan a hreh em avangin, nun khawhar a hmang ta a ni.

Pi Susan-i chu apple kung (red apple kung, apple sen tak chi) hnuai a thlen chuan, a chawl a; boruak tha chu am takin a’n hip vang vang a. A huan mawi tak mai chu a’n thlir kual leh a, lungawi hlaih hlaih niawm taka lu thing ner ner chung chuan, kal zawm a’n tum leh chiah chu; a ke bul lawka apple sen-lar tak mai, a kungpuiin a thlauhthlak tak avanga leia rawn tla ta tih hriat mai hi a zuk hmu ta a. Pi Susan-i chuan apple chu a chhar a, a’n en vang vanga a; chu apple chuan a zing tho engmah la ei lo, kaw ruak taka a awm tih a hriatchhuahtir nghal. A pumpui chhung lam chuan, thiana insiam turin Pi Susan-i chu an lo tur ve nghal et et bawk. Pi Susan-i chuan apple chu a en kham thei tlat lo. A mit, khua hmu fiah thei tawk tawh lo tak mai chu zim te-a meng si se chungin, chik fe fe hian a’n thlek a; mawi a ti, nalh a ti hle bawk. Chutih ruala a rilrua rawn lang chu, a pasal kha a ni. A pasal, apple ngaina tak nena an lo enkawl thin, Red Apple kung chuan rah a chhuah ta a, tuihnai tak leh ei chakawm hlaih hlaiha a awm te hi a pasal khan hmu ve se a ti hle a; a pasal nena han ei dun atan a it hle bawk. Mite’n, ‘Tar-te dawn zawng a tawi ta mang e!’ an lo ti palh dah ang e, tih lam ngaihtuah lek lo chuan; a theih ang tawka hmanhmawhin a thenawm hnaivaite In-ah lut chhuak kual vekin, a apple sen-lar tak te chu a entir ta hlawm a. A hmu apiangin nalh an ti, mawi an ti, ei an chak hlawm hle bawk. A apple chuan, fak a lo hlawh nasa hle a; a mawina leh nalhnate chu an lo fak bang thei hlawm mawlh lo. Ei atana a it-awm ruala, ei mai chu a pamhmaizia thute nen lama an lo fakna aw-ri, a benga cham veng veng chung chuan; Pi Susan-i chu hlim takin a In chhung chu a lut a. ‘A rah dang ei sen lohvin a la awm dawn chauh alawm le, dah-mawi / hun-mawi atan chuan khek lo mai teh ang,’ ti niawm tak hian, a chawhmeh siamna chemte chu a hru fai ta mawlh mawlh a; apple chu, a lai taka tin-zawnin a han phel ta a. Pi Susan-i chu a phu ta zawk mai; a thil hmuh chuan engkim engkim mai hi a hnawt bo ta nghal vek. Apple chhung laimu bawr vel chu, a dum tuau va; hmun thenkhat laia pangang-ina kawng a sial-te a’n hmuh chuan, Pi Susan-i chu ka-hau hian a ding ngawi reng ta ringawt. (apple hnip thawp sap sap mai chu, kam ding-vei thlak tawn zak zaka han thial a beisei awm teh lul nen………) ("Red Apple" by S.Steve Jez)