Apple – He company hi computer industry-ah a lar ber pawl a ni. Hardware leh Operating System siamchhuaktu a ni. He company hotupa ber, co-founder Steve Jobs hian apple a ngaina em em a, apple lam hawi company-ah eng emaw chen a lo thawk tawh nghe nghe a ni awm e. He company an din tan tirh vel hian a hming sak tur mai an hre lo va, Company register a tul tawh si, a hote hnenah uluk taka company hming lo sawiho tura a tih pawhin an hre mai si lo va. Co-founder Steve Jobs-a chuan fiamthuin, apple ei tuam tuam pahin, “Company hming tur in hriat loh chuan APPLE tih ka hmang mai dawn e,” a ti a. Tichuan, nuih bawk bawk chungin APPLE Company tih hming chu an pawm tlang ta a nih chu!

Google – Khawvel computer history-a kan theihnghilh leh ngai tawh loh tur, Internet Searching Engine lian tak leh tun laia kan thalaite lawm em em, Orkut siamtu a ni a. Computer khawvela sulsutu ber Microsoft company hial khumtu a ni. A tirah tak chuan an Company hming hi GOOGOL tiin an phuah a, Internet khawvela information hrang hrang awmze nei taka dahkhawm leh awlsam taka tupawhin kan zawn hmuh zung zung theih nana buatsaih a ni. GOOGOL ti-a an phuah hnuah registration tih laiin GOOGLE tiin an lo ziak sual hlauh pek a nih chu! Registration card leh check an han dawn meuh chuan GOOGLE tih a lo inziak vek mai a, nui hawk hawk chungin GOOGLE tih hming chu an hmang hlen ta a ni.

eBay – Hei pawh hi Internet khawvela Company lar tak a ni. A hming hi rangkachak laihchhuahna Company pakhat, Echo Bay Mines Limited hming chawia phuah zu ni leh daih pek a! A phuahtu hi Pierre Omidyar a ni. Internet lama ngaihtuahna seng tak leh tui tak a ni. Bungraw hrang hrang hluihlawn tawh hnu hralh leh kharchhawng mi a ni. Hemi kawnga a sumdawnna atan Auction Web, trading website a siam bawk. A hming atan Echo Bay Technology Group a vuah nghe nghe. Mi tam takin Nevada khawpui Echo Bay hming chawia a sak chhan an zawh hian, “It just sounded cool.” a ti mai thin. Echo Bay Mines Limited, gold mining company hian EchoBay.com website hmingin an Website an registered bawk. Tichuan, hun eng emaw hnuah Echo tih hi a lamtawia dahin eBay.com tiin an ko hlen ta a ni.

HOTMAIL – Hei hi Internet khawvela searching engine leh lehkha kan inthawnna (e-mail) company lar ber pawl a ni. He company puipa ber, Founder Jack Smith-a hian email hmanga khawvel hmun hrang hranga computer network (internet) kaltlanga thu kan inhlanchhawn theih dan a ngaihtuah chhuak a, India Scientist ropui, Sabeer Bhatia-a’n Mail Service a han atchilh tak tak a, HTML (Hyper Text Markup Language) hmangin Mailling a siam zung zung mai a. Mailling zawng zawng HTML hmang veka buatsaih a nih takah chuan HTML hmanga Mail tih sawifaih nan, a tirah chuan HoTMail an ti phawt a, hun a rawn kal zela hawrawp pui veka ziakin HOTMAIL tiin an thlak leh ta a ni.

Yahoo : Yahoo tih hian a kawh ber chu mihring taksa ang pu si, hmelchhe tak, Mizote’n Phung kan tih ang sawina hi a ni. Yahoo tih hrim hrim hi Jonathan Swift-an Gulliver’s Travels tih lehkhabu atanga a hmuh a ni a. Yahoo! Founders pahnih David Filo leh Jerry Yang-te, thian dun hian fiamthu an duh ve khawp a, “I hmelchhe lutuk, yahoo i ang si…” tiin an inchhaih fiam thin a, an fiamthu chu bansan thei hek lo le, an Company hmingah YAHOO! tih an hmang ta a ni. Hetianga fiamthu company hminga an hman tak tak hnuah a hming pum atan thu awmze nei deuh remkhawmin – “  Y’et Another Hierarchical Officious Oracle!” tiin a lampum hi a siam rem ta a ni. He thu awmzia ber chu “Eheu, Database leh query buaipuina tur Oracles dang a ni leh ringawt mai alawm le!” tihna ang deuh a ni. Hetih hun lai hian Internet Khawvelah Database lam hawi inelna a nasa hle a, Oracles Company hi hetiang lam Software company-ah chuan a langsar lawr lak bawk a. Yahoo company hian helam pangah hian khalphung thar tha zet an duang chhuak a, awlsam takin Search Engine, Mail facilities leh Database lam hawi an rawn chhawpchhuak thei ta hi an inchhuang ve hel a, “Oracles ang maia hanthawk thei kan siam ve e!” ti-a mipui min hriattirna tawngkam a ni ber mai.

          Hming sak thu hla-ah hian keini Mizote hi kan kulmuk hlein kan duh tui hle. Hetih lai hian kan hming leh kan khawsazia erawh mi tam takah a in-tu lo hle thin. Entirnan (a tak tak a ni lo a nia!) -  Pu Felfamkima chu a fel famkim tawk loh avangin Office atanga suspend a ni. Pu Ramfangzauva chu a zin ngai lo reng reng a. Kum 60 a nih hnuah pawh Aizawl a la thleng miah lo. Pu Liantuala chu a upa tulh tulh a, a te tulh tulh bawk. Pu Zaia a zai ngai reng reng lo. Pu Sangbera chu City Police interview beitute zingah a hniam ber. Pu Rinawma pawh sum leh pai chungchangah a rinawm loh avangin Police te’n an man. Kan awm dan ang hian kan hming hi sak ni ta se, kan hming a mak awm ka ti thin. Aw le, kan hmuh leh hriat ang hian khawvela Company taima leh ropui tak takte erawh sakhming phuah lamah an buai ve lo hi an entawn tlak hle in ka hria.

Source : The Zozam Times (Daily News, November 26, 2009)

               Diktawn (January 2010)