He hla,‘Ka ngai em che!’ tih hi Zofa thalaite chuan kan hmelhriat viau tawh awm e. A satu leh a phuahtu nih pah fawm, Lalnunsanga hian, he hla hmang hian lungduh lenrual ngaiin Zofate min kurtir ngun tawh hle bawk awm e. Lalnunsanga hi zofa thalairual chuan kan hre fur tawh ang. Thenkhat chuan, T.Melody (Tahan Band)-a Voacalist/Singer anga hre mai te pawh kan awm awm e. Chu lam chu, dah tha rih phawt mai ila. Amah, Lalnunsanga hi kei aia hrechiangtu leh belchiang zawk tute an awm ngei ang le. Chung mi te tih awm tak mai, kil khat atang keiina a hla (Lalnunsanga Hla) ka lo chai ve ringawt tur hi chu inthiam lohna chin pawh ka nei. Lalnunsanga hi ka ngaihsan em vang zawkin ka’n thai thla ve tawp zawk dawn a ni a. A nuna entawntlak tam tak awmte chu va phawkchhuak zo lo mah ila, Zofate thinlungah Lalnunsanga hi Vul Reng Se…tih beiseina nen bul i’n tan tawh teh ang.   

A phuahtu thinlung han mitthla phawt ila. A phuahtu hi thenrual, thiante ngaina tak zawng a ni ngei ang le. Thiante nen hrui khat vuanin, thinlung hmun khat pu-a an len dial dial lai te, Sappui nun ngai bik lova thiante nen hlim-ni chena an lenho thin laite chu ngai em emin nunkhua a hmang thin a; chu nun khawhar atanga rawn irhchhuak, a hla thute en hian thian, thenrual, a ngainatzia  chu a lang chiang viau awm e. Thiante a hlimpui thin zia chu a hriat theih hle.

Chang 1-na : ‘Zofate hi rual pawl hnam kan ni. Rual pawl nuam ti tak leh, rual pawl lova tlei hlei thei lo hnam kan ni e,’ tiin sawi ta ila kan sawi sual em chu ka ring lo. ‘Ka ngai em che!’ tih hla phuahtu pawh hian min tawmpui lo thei lo tlat. Hringfate zinga’n, thian nei lova khawsa kan awm kher awm lo ve. Thian kan neih zat erawh chu a inang lo hle ang a. Chutih rualin, thian thate erawh an hlu hle a; thian tha ka neih zat leh thian thaa kan chhal chin, thian tha kan tehna pawh a inperhsan hlawm ngawt ta ve ang. Min hektute, kan chhiatna lai ngawr ngawr zawng thinte hi chu kan hmelhriat emaw, kan Sikul kalpui emaw, etc.. anga chhal mai hi a fuh zawk ang em? A enga pawh chu lo nise, Thian tiha kan chhal tawh chin hi chuan hlimna min thlen tlangpui awm e; min tihlim tlangpui thin.

Hla phuahtu pawh hian thian, thian tha a nei nualin a lang. Thiante nen hlimtlang takin khua chenho tawh mah se, thihna chauh ni lo, hmangaih leh hmangaihate, thian leh thiante inkara inthenna rorel thei thli hi a awm tlat pek a; hla phuahtu leh a thiante chu, eng thli emaw chuan a chhem darh ta ngei mai le. A ngainat leh a thlakhlelh em em thin, a thiante nena an lo chenho tawhna Vangkhaw tual chu khawhar leh lunglen changin a fang kual thin a. Sappui nun ngai bik reng reng lova an lo hlimtlanna thin leh an lo chenho tawhna thin Vangkhua chuan a hmel, a nihna leh a pianhmangah danglamna reng a nei lo; mahse, hlimna thlentu lenrual lungduh hmel hmuh tur awm ta lo chu (danglamna pakhat angin a chhal theih mai awm e!), lung vai em em hian a thiante chu a’n au ta ruai ruai mai a:

 “Mahte'n awmhar changin ka fang thin a,

 Lenrual kima kan lenna vangkhaw zau;

 A hmun leh tlang zawngte a dang chuang lo lenrualte u;

 Mahse,tawn ni in awm ve si lo...” tiin.

 

           Thunawn(Cho:) : Hlimlaini zawngte hunin herliampuiin, kawla ni chhuakin vawi tam chhilhhnan tawh mah se, nun hlui ngaih bang thei lo chung leh Vangkhaw tual laiah sulhnu chhui chunga lengin, ‘lengrual duhte u, in dam thin em? Min hrechhuak ve thin em? Min rawn ngaihtuah ve thin em?’ tiin a lenrual nghilh lo thinlung chu a rum a; hun hlimawm thin tak, lenrual kima an len lai ni kha a ngaihziate nen, ti hian a thunawn(Chorus)-ah a han auchhuak leh ta a:

          

 “Keizawng vangkhawpui sumtuala'n,

    Nun hlui ngai reng hian ka lo vai;

    Lenrual duhte u, in dam thin maw..? (Oo...o..o)

    Kei zawng vangkhawpui sumtuala'n,

    Kan/In sulhnu chhuiin ka lo vai;

    Lenrual duhte u, min dawn ve thin maw...?

    Nun hlui zawngte ka dawnkir chang ni hian,

    Hlim-ni, Hlim-ni...ka ngai zual thin mang e!!!

    (Hlimlai-ni kha ka ngai zual thin mang e!!!” tiin.

 

          Chang 2-na : Hringfate’na kan phak tawk atanga han teha Vanram no-te tia koh mai thieh, ram changkang leh nuam, Khawvela nuam tinreng kimna leh hlimna tinreng fuankhawmna hmun, ke pen sualte tana pil bo theihna leh mahni inthunun zo lo te tana Seol kawng ni bawk lawi si-a tuan ta, lenrual te chu:

 

“In lenna vangkhua zawng a mawi an ti;

 Lei hlimna par tin pawh a vul mahna….” tiin a chang hnihna atan bul a tan leh a.

 

           ‘Mahse,’ tiin a’n chhunzawm lehnghal a. Silh leh fen, ei leh bar tur zawngin pasal leh fanaute an fehchhuah hlana khawhar taka riah run (In) lo nghaktu, khua a lo tlaiin pasal leh fanaute hmel hmuh hlan nghakhlel taka kawngka biang atang dingdihlipa lo thlir reng thin tu, chhungkaw nu ber chan iangin; lenrual lungduhte nen hlima an lo tuanza tawhna Vangkhawipui nghaktu chuan, mual za tam kar dana leng, lenrual lungduh tak tak te hnenah chuan, “ Mahse, Thiante u, kei a Riangte hi min theihnghilh bik lo hram rawh u aw…” tiin a’n ngen ngawl a.

 

“Mahse, kawlvalenchhama riah run nghak, a riang te hi,

 Min nghilh lo r'u, lenrual duh te u...” tiin.

 

           “Hlimni, Hlimni ka ngai zual thin mang e!” tiin a tawp a khar a.

 

           He hla hian thiante hlutzia te, thianzahova kimtea len lai ni ngaihawm theih thinzia leh kan nunkhua hman a zawnga hun hlu tak a nihzia te a tarlang chiang hle in ka hria. Kei zawng, he hla thu leh thluk hian min fanchhuak hneh hle. A hla thu leh a thluk hi a inchawih mawi hle in ka hria. A sa-tu aw hian a hla hi a thuam mawi hle a, ‘a timawi famkimtu a ni e’ ka ti duh hial. A phuahtu thinlung hi fakawm ka ti hle bawk. Amah, Lalnunsanga hi thalaite thil tihhonaah thahnem ngai taka thawk thin mi leh Khawtlang, Kohhran-ah te pawh mi inhmang thin tak a nih te hi, a entawn tlak hle a; Zofate hian i hmuh hmaih ngai hauh lovang u. “Fak tlakte chu fak rawh u. Chawimawi tlakte chu chawimawi rawh u.” tih hi, kei chu ka thupui a ni e!

 

 

          

Belhchhahna :     Tu-te emaw chuan, Lalnunsanga hi zai thiam chu an ti em em tho na a; mahse, a aw a thlak danglam ngun lutuk te, teng taka a zai (a aw a chhuah) thin te hi an ngaithei chiah lo va. Khawvel pum huapa kan dakchhuak a nih ngat chuan, ‘Ka Phur Zo Lo’ tihah leh ‘Nun Khawhar’ tih hlaa a aw a siam hran/danglam thiam dan te; hla khat chhungah pawh nise, a hla thu leh thluk azirin a sak lungrun hun lai tak maia a han sa lungrun em em thei zel te hi thlir chuan, Lalnunsanga hi fak mawlh mawlh tlak zawk a lo ni. Aw pek dan (aw Control) chungchangah chauh ni lovin, engkimah hian a hun leh a hmun a zira chet-lak leh insiamrem thiam hi Zofate (tih-)makmawh tak a ni e. ‘Leikapui Style’ (Leikapui zai)-in a awpbeh tlat te chuan Lalnunsanga hi sel thin mah se; kei erawh, a lamah ka tang zel dawn.