USA Education kalhmang hi kimchang taka inhrilhfiah tur chuan thuife ziah a tul dawn a, USA chhungah rau rau pawh zirna sikul leh geographical location azirin tihdan inang lo a awm nual a. Zofaten kan hriatthiam theih dan tur leh kan hlawkpui tur pawimawh tlangpuite han tarlang mai ila.

Educational Structure

American tam berte hian kum 12 chhung lehkha an zir tlangpui a, chawhrualin zirna thlensan lamah pawl 12 zirzo an tam ber. High school hi pawl 9 atanga pawl 12 a ni. High school zawh hian diploma emaw certificate emaw pek an ni a, chumi hnuah college, university, vocational (job training) school, secretarial school, leh professional school-ahte zirna an chhunzawm thin.

Pawl Then Dan Tlangpuite

Preschool :

Kum 5 hnuailam (private a ni tlangpui)

Elementary Shool:

Pawl 5 hnuailam zawng a huam. A tlangpuiin kum 6 an nihin pawl 1 an zir tan. Pawl 5 an zawm hian kum 11 an ni tlangpui.

Middle School:

Pawl 6 atanga pawl 8 chhung a huam a, kum 11 atanga 14 inkar an ni tlangpui.

High School:

Pawl 9 atanga pawl 12 a huam a, kum 14 atanga kum 18 an ni tlangpui. State thenkhatah chuan pawl 10 atanga 12 inkar hi high school chin a ni.  High school-ah hian English, Maths, science, leh social studies-te zir ngei ngei tur a ni a, sikul thenkhat chuan ram dang tawng (foreign language) kum chanve tal zir ngei ngei turin an tuk bawk.

Mark (Grade) Pek Dan Tlangpuite

1. Classroom participation.
2. Midterm examination.
3. Research or term papers, or laboratory reports.
4. Short exams or "quizzes."
5. Final examination.

Mark Then Dan Tlangpui (Grading Scale)

A			B			C			D			E, N, U or F
+		-	+		-	+		-	+		-
100-97	96-93	92-90	89-87	86-83	82-80	79-77	76-73	72-70	69-67	66-63	62-60	Below 60 Percent

A = Excellent; B = Above Average; C = Average; D = Below; Average F = Failure

Hriat tur pawimawh:
Texas or Virginia state-ah chuan mark 70 aia tlem ("D" grade) hmu hian an subject zirlai an fail a ni. Zirlaiin subject khat a fail chuan pawl sawn turin kha subject bawk kha beih nawn leh a tul a ni; subject dang a pass tawh zawng zawng chhannawn a tul tawh lo.

Zirna Sang Zawk (Higher Education):

Miin high school (pawl 12) a zir zawhin college emaw university emaw a lut thei nghal a. High school piah lam zirna sang zawk hrim hrim hi higher education tih a ni. Degree an pek tlangpui palite:

1. Associate's
2. Bachelor's
3. Master's (First Graduate Degree)
4. Doctorate.

Associate's degree hi kum hnih zir a ni. A.A emaw A.S emaw tia koh a ni bawk. Kum hnih dang an zir zawm chuan BA emaw BSc emaw pek an ni. Higher education hi undergraduate, leh graduate education (postgraduate tia koh a ni bawk) tiin an then hrang leh a. Undergraduate education hian Bachelor's Degree la tura inzir mekte a huam a, BA / BSC zirlaite chu  'undergrad' tia koh thin an ni. Undergrads-te hian, 'BA/BSC ka zir mek' an ti ngai mang lo a, "Undergrad ka ni" an tih loh leh "Chu mi / kha mi chu ka major" an ti mai thin.

Bachelor's degree (BA/BSc) piah lam zirna hi Postgraduate education emaw Graduate tia koh a ni ve leh a. Postgraduate hian bachelor's degree aia zirna sang zawk hrim hrim, Master's degree leh doctorates-te a huam tel. Graduate education tih hian 'Master degree' tia kan hriat thin kha a huam deuh bik. MA emaw MSc zir mekte hi 'Grad students' tia koh mai an ni thin. Heng zirlaite hian, 'Master's degree ti mek ka ni' emaw 'Grad student ka ni' an ti tlangpui.  Master's degree tluk deuh thaw hian Advanced degree tih hi an hmang uar bawk a, advanced degree hi chuan MA/MSc degree a huam tel tho lain abikin law, medicine, Master of Business Administration (MBA), leh Doctor of Philosophy (Ph.D.)-te koh nan an hmang bik duh chawk.

Doctoral Degree (Ph.D.):

USA-a degree hmuh/thlen san theih ber a ni. Doctoral degree lar ber te: Ph.D. (Doctor of Philosophy), J.D. (Doctor of Law), M.D. (Doctor of Medicine), leh and D.D.S. (Doctor of Dental Surgery). Master degree zawhah kum li atanga kum 6 an bei leh tlangpui; chu aia rei pawh zir an awm nual.

U.S Higher Education Zirna Sikul Hrang Hrangte

1. State College or University:
State school-te hi local emaw state sawrkar emawin an support tlangpui a, US-a states 50 tinte hian a tlem berah state university pakhat leh college hrang hrang an nei theuh a, heng sikulte hi mipui hnen atanga khawn khawm chhiah (tax) hmanga inrel bawl an ni tlangpui. Chuvangchuan, state chhunga chengte tan chuan zir man senso a tlawm hle bik.

2. Private College or University:
Heng sikul-te hi private ho din (operate) a ni ber a, sawkhar nen inkungkaihna an nei lo tluk a ni. Tuition fees hi state sikul-te aiin a sang tlangpui a, sikul naupang an tlem deuhin zirna pawh a tha duh deuh bik.

3. Two-Year College:
High school zo tawhte an lut tlangpui a, Associate's Degree pek an ni thin. Two-Year college-ah hian major hrang hrang a awm ve thliah a, degree puitling erawh an pe ngai lo. Khua a tet deuh vang te, leh associate's degree hian hna hmuh a awlsam deuh avang tein two-year college hi zawm an ni tlangpui a, degree puitling hmu turin he mi piah hian kum hnih dang college or university puitlinga chhunzawm tur a ni.  Two-year college hi sawrkar sikul an ni duh tlangpui.

4. Community College:
two-year college a ni tlangpui. Ram dang sikul naupang tana bul intanna tha tak a ni. Sikul dang aia a that biknate:  1. Zir man a tlawm 2. Chhun, zan, leh inrinni class a awm 3. English zirna program tha ber ber a awm 4. Foreign student an welcome tha 5. 4-year University transfer theih turin subject hrang hrang an nei kim deuh vek.

5. Technical Institute:
Medical technology or industrial engineering lam zirna a ni tlangpui. Degree pe leh pelo an awm a, an thil tum ber chu hna thiam taka thawk thei tura special taka inzirtirna a ni.

6. Institute of Technology:
Kum li zir. Science leh technology an zirtir tlangpui. Master Degree thleng an zirtir tlangpui.

7. Professional School:
Professional school ah te hian Arts, Music, Engineering, Business leh thil dangte pawh a zir theih. Graduate degree hi zir san ber theih a ni. University liante hnuaiah an awm tlangpuia, mahnia ding hrang pawh an awm ve bawk.

8. Church-related School: US-a college leh university tam tak hi kohhran din leh enkawl an ni. Entir nan: Princeton University hi Presbyterian Church (PCUSA) nen inkungkaih tlatna a nei.

Zirman Tlangpui

1. Student Loans
2. Scholarships

College/University Admission

Sikul that dan azirin tehfung chi hrang hrang a awm a, hengte hi college luh nana pawimawh berte an ni.

1. High school mark (GPA)
2. SAT (Scholastic Aptitude Test) scores
3. Written essay
4. Personal Interview
5. Recommendation
6. TOEFL(ram dang sikul naupang tan )

USA-a Lehkha Zir Duh tan

Contacts :
USA-a zir duh/chak ten engtik lai pawhin email, mail, or phone hmangin Laldinpuia (Satawmpuia) a zawh theih reng a ni. Zawt duh tan:
Laldinpuia Rodawla
17504 Park Mill Dr.
Derwood, MD 20855
Phone: 301-461-8087
Email: laldinpuia@gmail.com