Hringnun kan zawh chhung hian ni tin eiin zawn leh khawsak changkanna lam zawngin kan phe reng thin a. Sorkar hnathawk, Company hnathawk, sumdawng mi etc., thliar bik nei lovin kan zain inang khat vekin kan ni tin khawsak dan a nawm theih nan leh nun kawng hmasawn tumin kan zirin kan thawk theuh awm e. Mahni tan hlawkna leh hmasawnna chhete mah beisei lova thawk leh zir kan awm lo vang. Kan chenna khawvelin hma a sawn chak ang zelin thangtharte thinlungah pawh hmasawn duhna rilru puin company liana hna tha tak tak thawh duhna te a lo lian chho zel bawk a. Hna tha hmuh leh thawh kan duh chuan keimahniah bawk a innghat a, ruahmanna fel fai tak, CV/Resume tha tak ziak dante, interview-na a tan inbuatsaih dan te hi kan hriat a pawimawh hle.

Interview tam zawk an hlawhchhamna ber nia lang chu engvanga hnathawh duh nge an nih tihah an chian tawk loh thin vang a ni an ti. A then sum leh pai um vanga thawk, a then erawh awm awl vang, a then erawh hmasawn zelna (Career developmet) ngaihtuah vanga hna tha zawngte pawh kan awm nuk awm e. Engkim kan tih dawn hian ruahmanna fel tak kan neih thiam a pawimawh em em a ni. Engkima ruahmanna fel tak kan neih chuan ruahmanna nei ve lo te ai kan hlawhtling zawkin duhsak pawh kan hlawh zawk dawn tih erawh a chiang. Xerox company-a hruaitu pakhat chuan CV ziak dan pawimawh zia a sawi naah “Hna hmu turin CV ziak dan hian 40% thu a sawi ani,” a ti. Kan CV leh cover letter te hi kan inhmelhriattirna pawimawh tak leh engvanga hna dil nge kan nih tih tarlanna tha ber ani tih kan hriat reng a tha. Kan CV a ziah sual te, tihdik loh palh te kan neih erawh chuan interview tura koh zingah pawh kan tel phakin a rinawm loh. CV ziak dan tam tak a awm, a dik ber erawh a awm hran lo.

Cover letter hi tawi fel tak phek khat ai tam lova ziak tur a ni. Kan sawi tawh angin cover letter hi kan inhmelhriattirna tha ber leh interview tura koh min chakna chhan ber tura kawng awm chhun a nih vangin fimkhur taka ziak a tul. Company hna dil 85% vel an chetsualna ber nia an sawi chu an cover letter-ah tihsual palh te, tawngkam mawihnai lo te an hman vanga interview tura koh pawh hlawh lo an ni. A nih leh engtin nge cover letter tha tak kan ziah ang? Cover letter kan ziah chuan: (1) Kan hna dil rank (2) Kan qualification (3) Kan hna dilna company kan hmuh dan leh eng vanga dil nge kan nih tih fel fai taka tar lan leh interview min ko tura ngenna te hi a tel ngei tur a ni.

CV or Resume eng tinge kan ziah ang?

Resume pawimawh zia kan sawi nual tawha, tlemin han chhui zau deuh dawn ila. Resume kan ziak dawn a nih chuan contact information, Objective, Qualification summary, Education, Experience leh thildang kan hna dil min tanpui thei tura kan ngaihte kan ziak tel ngei tur a ni. Resume ziak dan a dik ber tih a awm lova, mahse a chunga kan tarlan te tel lo chuan resume puitling kan ti thei lo vang. Mite ziak dan zul zuia ziak hi a pawina a awm hran lo va, mahse tawi fel taka ziah thiam erawh a tha. Resume kan tih hi kan tum mi tak tawi fel te “Kei” (I) tih hmang lova ziak (incomplete sentence) hi a ni ber awm e. Kum 5 ai tam work experience nei lo tan chuan phek khat ai tam ziak hi a tul lem lo.

Contact Information: Kan resume chung berah kan Hming, Address, Telephone no., Email address te tawi fel taka ziah tur a ni. Kan email ID hi tawng mawi lo sexyjoe@yahoo.com tih ang te kan hmang a nih chuan a fel lo vang.

Objective: Hei hi kan resume pawimawhna ber, kan hna dil tarlanna a ni. Tihuan a hnuai lama kan ziak te’n he objective hi an focus vek tur ani. Kan resume lo entuten kan CV a kan ziak zawng zawng hi an chhiar vek kher dawn loh a ni tih hre rengin, objective hi fimkhur taka ziah tur a ni. Chuvangin objective a kan thil ziak hi a pawimawh hle. Company-a hna kan dil reng rengin kan hna dil leh kan thiamna a inmil leh mil loh an lo en hmasak ber dawn avangin kan hna dil fel fai taka kan ziah thiam a pawimawh.

Qualification Summary: Tunlai ah hna tha hmuh duh leh hlawh tam beiseiin Company-a hna dil an tam theih em em avangin resume a kan ziak zawng zawng hi an lo chhiar vek kher lo a ni tih hriat reng tur. Expert ho hian resume pakhat chhiar nan second 10-15 chauh hun an hmang thin. Chuvangin kan hna dil chiang tawk leh fiah tawka kan ziak a tul. Kan hna dil (Objective) ziak hnuah qualification summary-in mawi takin a thlawp tur a ni. Amaherawh chu experience neilo/tlem te tan erawh qualification summary hi ziah tel loh pawh a pawi hran lo.

Education: Kan hna dil nena inmil thiamna degree, GPA leh training kan kal tawhna te ziah lan tur ani.
-Kan degree , major, kan graduate-na University leh address
-Kan course zir tawhten kan hna dil a tanpui theih dan tur
-Training kan kal tawhna leh training a kan zirten tuna kan hna dil a tanpui dan tur
-Khawtlang tana kan lo inhman ve tawh thinna te… hi ziah ngei tur.

Experience: Full-time, part-time leh volunteer hna kan lo thawh tawhte ziakin, kan hnathawh rank, company hming, address leh phone no. te ziah ngei a tha.

Other: Training kan lo neih tawh zawng zawngte ziak tur a ni. Entirnan; Computer, Foreign language.

Sample Resume

John Liana 10 Oak Street Springfield, MA 01118 413-748-300 jliana@yahoo.com
Objective
Competitive team player with excellent sales and communication skills seek sale position
Qualification summary
Degree in business with a concentration in marketing. Marketing internship and marketing research experience. Sale and customer experience.
Education
B.S.Business Administration/Marketing courses	Springfield College, Springfield, MA 01109.Business major with a concentration in marketing. 3.5 GPA. Graduation day May 2010. Sales-developed communication skills through three classes presentations. Sales skills developed through 10 sales role playing exercises.Marketing Research-developed a questionnaire and conducted survey research for a local business, developing a customer profile to be used to target market sales promotions.
Marketing Intership	Big M Supermarkets, 1050 Roosevelt Av.,Springfield, MA 00117,413-745-2359
Basketball Team	Member of the varsity baseketball team for four year.
Experience
Salesperson	Eblens, 100 Cooley St., Chicopee, MA 00111, 413-745-1359.Sold clothing and footwear to a diversity of customers. Employee of the month in July for the highest sale volume. Supervisor: Susan Miller. May to August 2009.
Landscaper	Eastern Landscaping, 10 Front St., MA 01020,413-745-9515. Helped attract two new customers, a 5% increase. Interacted with customers and resolved complaints.

Interview engtin nge kan in buatsaih ang?

Interview-a zawhna an siam theih ang, mahnia lo inbuatsaih chhinna kan neih hian kan inteview hunah mahni inrintawkna min neihtir mai ni lo vin, hlawhtlinna pawh min thlen fo thin a ni. Entirnan;

1. Ka thil tihsual palh atang enge ka zir?
2. Engvanga he hna hi dil nge ka nih?
3. Keimah leh keimah eng angin nge ka inhmuh?
4. Eng qualification neiin nge he hna hi ka dil? heng ang zawhnate hi mahnia kan lo inbuatsaih ve theih chuan a tluktu a awm lo vang. Interview a tawngkam mawi leh tha hman thiam hi hlawhtlinna a min hruaikaitu pakhat a ni bawk. Entirna pakhatin han tarlang dawn ila, “ Hnathawhna kawngah eng lam nge harsatna i neih thin,?” tih zawhna hi han chhang dawn i la. “A changin ka thawhpuite nen kan inmil lo deuh thin” tia chhanna ai chuan “Mi taima tak ka ni a, ka thiante thawk tha peih lo deuh ka hmuh hian thawk tha tura thurawn ka pek changin inmil lohna kan nei deuh thin” tia chhanna chuan a ngaithlatu (Interviewer) rilru kan hneh zawk i ringlo maw?

Hna hmu tur chuan interview kan tih that a pawimawh. Xerox company a hna latu (Recruiter) pakhat chuan “Interview an tihthat a zirin hnathawk tura lak tur leh lak loh turah 60% thu a sawi a ti”. Chuvangin interview kan tihthat a pawimawh hle ani. Interview kala thianghlim mawi tak-a inchei thiamna hian mahni rilru a tihlim mai ni lovin interview-tu ten min lo hmuh dan pawh a dang a ni tih hre rengin mawi thinghlim tawka kan inchei thiam a tha. Kan Interview laia hlimhmel put thiamte, nuih siau thiamte, thu awih hmel tak anga awm thiam te hi thil pawimawh tak a ni. Interview-na a awm dan turte leh inchei dante hi a pawimawh em avangin tunlai khawvel College leh University tam takah “Hna zawn dan” (Job hunting) hi an inzirtir nasa hle. Tichuan interview result chhuah hnua kan tling ta lo a nih pawhin interview-tute hnenah kan tihfuhlohna te, kan tihthatna te, etc.. thiam taka zawhna kan siam atanga min chhanna hi kan tana hlawkna tha tak a ni.

Tunlai IT (Information Technology) hmasawn zarah kan chenna khawvel pawh a zim duh sawtin keini zofate pawh kan hmuh a zauvin kan zirna kan thiamna a lo sang chho ve zel bawk. Kan thenawm hnaivai leh kan hmuh theih ngeiah company lian tak tak office te leh NGO office te a awm nual, amaherawh chu zofate, heng office a thawk hmuh tur kan la tlem hle. Keini zofate pawh Multinational Company-te leh NGO office-te a hna hmu thei turin kan finna leh kan thiamna mai ni lovin CV/Resume ziak dan leh Interview tana inbuatsaih dan te te hi hriat ngei I tum ang u.

Note: Sample Resume hi Time and Career Management by Robert N.Lussier a mi lak a ni.

(He article pawimawh tak rawn ziaktu Sangtea Pa hian MBA(HR) a zir zo tawh a. Tunah Ph.D candidate niin South Korea-ah a khawsa mek a ni. Sangtea Pa ang mithiam kan nei hi chhaktiang mizote tan a thlamuan thlak hle a ni. Ed)